ritrattu : Claire-Lise de Zerbi

tuturiali di yoga

cun destinazione e scole…

pùblicu : ciclu 1>ciclu 3 (3-11 anni)

Prupunimu à l'insignanti una serìa di videò in ligna, lìbbere d'accessu. Sti tuturiali per l'elevi sò cuncepiti per permette à l'insignanti di sperimentà o d'inizià in a so scola una dimarchja chì, in a scola, integra a persona di u scularu cum'è un pernu per l'amparere è u megliustà à a scola.

 

Sò sèmplici l'esercizii, ancu sì certi dumàndanu una vera attenzione.

 

L'effetti aspettati di l'esercizii pruposti sò di trè categurìe :

 

• Amparà à fucalizà a so attenzione

• Amparà à dis-tèndesi

• Amparà à dinamizassi di novu

 

U sperimentu fattu in una scola di CM2 di a scola Charpak in Bastia in u 2015/2016 ci hà permessu di custatà chì ste pràtiche sèmplici fàcenu mutà cun favore a pusitura mentale di l'elevu. Avemu custatatu ind'è l'elevi di sta scola una ricettività più bona, un'attenzione rinfurzata, una cunfidanza più maiò, un benestà sensìbule è spartutu in u gruppu scola.